టీఎంసీకి మరో భారీ షాక్: రాజ్యసభ ఎంపీ పదవికి నటి కోయల్ మల్లిక్ రాజీనామా

పశ్చిమ బెంగాల్ మాజీ ముఖ్యమంత్రి మమతా బెనర్జీ నేతృత్వంలోని తృణమూల్ కాంగ్రెస్ (టీఎంసీ) పార్టీకి మరో గట్టి ఎదురుదెబ్బ తగిలింది. ప్రముఖ నటి, ఆ పార్టీ రాజ్యసభ ఎంపీ కోయల్ మల్లిక్ తన పదవికి రాజీనామా చేశారు. గురువారం తన రాజీనామా లేఖను రాజ్యసభ ఛైర్మన్, ఉపరాష్ట్రపతి సి.పి. రాధాకృష్ణన్‌కు ఆమె సమర్పించారు. తన రాజీనామాను తక్షణమే ఆమోదించాలని ఆ లేఖలో కోరారు.

ఈ ఏడాది ఏప్రిల్‌లో రాజ్యసభ సభ్యురాలిగా ప్రమాణ స్వీకారం చేసిన కోయల్, పదవి చేపట్టిన కొద్ది నెలలకే వైదొలగడం గమనార్హం. ఎంపీగా ఎన్నికైనప్పటికీ, ఆమె ఇప్పటివరకు కనీసం ఒక్క సెషన్‌కు కూడా హాజరుకాలేదని సమాచారం. కోయల్ నిష్క్రమణతో ఇటీవలి కాలంలో టీఎంసీ నుంచి తప్పుకున్న రాజ్యసభ ఎంపీల సంఖ్య నాలుగుకు చేరింది. గతంలో సుఖేందు శేఖర్ రే, సుస్మితా దేవ్, ప్రకాశ్ చిక్ బరైక్ వంటి నేతలు కూడా రాజీనామా చేశారు. ఈ వరుస పరిణామాలతో ఎగువ సభలో టీఎంసీ బలం 9కి పడిపోయింది.

పశ్చిమ బెంగాల్‌లో టీఎంసీ ఎదుర్కొంటున్న అంతర్గత సవాళ్ల మధ్య ఈ పరిణామం చోటుచేసుకోవడం ప్రాధాన్యత సంతరించుకుంది. ఇప్పటికే పలువురు సీనియర్ నేతలు, ఎమ్మెల్యేలు పార్టీని వీడి బీజేపీ వైపు చూస్తున్నారనే ప్రచారం జరుగుతోంది. రాజీనామా అనంతరం కోయల్ మల్లిక్ కేంద్ర మంత్రి భూపేందర్ యాదవ్‌తో భేటీ కావడంతో, ఆమె రాజకీయ భవిష్యత్తుపై రకరకాల ఊహాగానాలు వ్యక్తమవుతున్నాయి.